Proxecto dinosaurios

Levamos dúas semanas investigando sobre os dinosaurios na aula. A verdade é que este tema apaixóanos! 

Comezamos por elixir a materia a pescudar cunha votación, na que participou tamén o equipo verde. Gañaron os dinosaurios, aínda que os insectos tamén foron moi votados. 

Primeiro descubrimos que na nosa aula había algúns dinosaurios: no recunchiño dos animais atopamos un estegosaurio e un anquilosaurio.

Grazas á colaboración das familias chegaron á aula materiais relacionados co tema: xoguetes, crebacabezas, debuxos, contos, libros informativos...

Observamos que os dinosaurios poden ter dúas patas (bípedos) ou catro (cuadrúpedos). Os bípedos, coma o tiranosaurio ou o espinosaurio, podían correr e moverse con axilidade porque lles era preciso para cazar. Os cuadrúpedos, coma o anquilosaurio ou o diplodocus, podían ir máis lentos porque a súa fonte de alimentación, a herba, plantas ou follas, non fuxía! Observámolos e clasificámolos. 

Por outra banda, deseñei material manipulativo para desenvolver destrezas de lectura, escritura, lóxica e matemáticas. Está nos recunchos e todo o alumnado pode acceder a el. Tamén hai lugar para propostas máis artísticas. 

Parabéns Mateo!

Hoxe celebramos na aula o aniversario de Mateo. Adiantámosnos un chisquiño xa que realmente Mateo fai catro anos este domingo. 

Mateo preparou a súa tarta con tantas candeas como anos fai. Logo cantámoslle "Parabéns para ti" e desexámoslle o mellor para os seus catro anos. 

Parabéns Mateo! 

Aquí podedes escoitar a canción que cantamos nos aniversarios:

Comezaron os obradoiros inter-clase!

Todos os venres durante dúas sesións xuntámosnos as nenas e nenos de todas as clases por idade. Así imos coñecendo un pouquiño máis ás que serán as nosas compañeiras e compañeiros en Primaria!

Temos en marcha un obradoiro de arte, outro de ciencia e experimentación e un de expresión dramática.

No obradoiro de expresión dramática contamos o conto dos Chibos Chibóns, participamos cos nosos pezuños facendo "patín, patín, patín", "patán, patán, patán" e "patón, patón, patón". Tamén puxemos caras terribles de ogro malvado! E para rematar, como estaba un día estupendo decidimos dar un paseo polo Carboeiro. Pasamos por unha ponte de pedra e vimos unha herba moi verde...sería que vivían aquí os Chibos Chibóns e mailo ogro?

Desfrutamos moito o paseo na compaña das nenas e nenos das outras clases. 

Nós lemos o conto na aula e gústanos moito pero na rede tamén se pode ver aquí:

Avanzamos pasiño a pasiño

Que facemos ao longo da xornada?

Chegamos, colgamos a mochila e sacamos a axenda. Colgamos o abrigo e poñemos o mandilón. Logo facemos a rutina da encargada ou encargado. Traballamos un pouquiño e xogamos nos recunchos. Despois merendamos e saímos ao recreo. Volvemos, temos un momentiño de descanso e calma. Facemos outro traballo e xogamos. Por último recollemos e preparámosnos para marchar. Habitualmente lemos un conto para rematar a xornada. Gústanos moito o Abezoo.

Mentres eles merendan aproveito para revisar as axendas. Ás veces algún neno ou nena esquece sacala da mochila...e se non me dou conta, a min de revisarlla! 😌 

Aquí unha pequena mostra das actividades que fixemos estes últimos días...

Cambios na aula

Dende o comezo do curso foron numerosos os cambios na aula. Cada mestra e mestre temos o noso xeito particular de organizar o espazo e tamén de dispoñer todos os recursos para o alumnado. Despois de mover os mobles moitas veces, finalmente penso que atopei un espazo no que todas e todos nos sentimos ben. 

As nenas e nenos de tres anos comparten a mesma mesa porque como adoitan precisar máis axuda, podo facelo mellor se están agrupados. 

As nenas e nenos de catro e cinco anos están mesturados porque aínda que hai pequenas diferenzas nas súas capacidades, teñen maior autonomía. 

Pouquiño a pouco irei compartindo imaxes dos pequenos cambios. Dos estantes, dos recunchos...aínda que todo se vai adaptando ás nosas necesidades!

Vistes os paraugas que fixemos para protexernos da chuvia no outono? Quedaron ben fermosos!

Parabéns Xalo!

O pasado día 8 de outubro o noso amigo Xalo fixo 4 anos. Celebrámolo o venres e Xalo preparou a súa coroa e as candeas flotantes. Tamén botou na auga catro diamantes de cores, tantos coma anos fixo. 

Xalo é moi doce, amable e meticuloso. Estamos moi contentas e contentos por compartir tempo con el. 

Parabéns Xalo! 

Benvido outono

O pasado 22 de setembro comezou unha das estacións máis fermosas do ano. Mentres non decidimos o proxecto a desenvolver este trimestre, realizamos propostas de outono como as que seguen.

Comezamos a explorar os recunchos

 Hoxe comezamos a xogar nos recunchos. En parellas xogamos e traballamos. Sen dúbida, o máis solicitado é a mesa de experimentación! 

 Ao longo das semanas iremos rotando de tal xeito que todas e todos poidamos desfrutar dos diferentes recunchos. 

Seguide lendo para velos!

Proxecto Schola

Durante este curso académico o noso centro, o Ceip do Camiño Inglés, desenvolverá o Proxecto Schola. 

Seremos quen de crear espazos acolledores que conviden á convivencia e favorezan as aprendizaxes? Ese será o noso obxectivo! 

As fontes de inspiración serán diversas e iremos mellorando o espazo da aula e do centro pouco a pouco. 

Aquí poderedes ver os avances. 

Comezamos o curso 2022-2023!

Comeza o novo curso con moita ilusión. Esta é para min unha nova etapa na que agardo compartir con vós unha viaxe ateigada de momentos inesquecibles. 

Botamos a andar polo novo camiño?

Seguro que deixamos pegada! 

Imos aló!